Ndryshimet e "Rruges se Arberit"

Asfalti nga 9 metra në projekt do të bëhet 7 metra

- Këshilli Teknik në Drejtorinë e Përgjithshme të Rrugëve vendos të ndryshojë projektin për Rrugën e Arbërit
- Drejtoria e Përgjithshme e Rrugëve ka kthyer mbrapsht projekti teknik të Rrugës së Arbërit në segmentin nga Ura e Vashës në Tiranë, duke kërkuar që në të të bëhen ndryshime teknike. Ndryshimet konsistojnë në zvogëlimin e gjerësisë së rrugës së asfaltuar nga 9 metra në 7 metra.
- Ndryshimet do të bëhen jo vetëm në segmentin Ura e Vashës - Ura e Brarit, por edhe segmentin në të cilin po punohet aktualisht, atë nga Bulqiza te Ura e Vashës. Ndërkohë që dy lote të këtij segmenti janë tenderuar dhe firmat fituese po punojnë.
- SPECIALISTËT: ndryshimi i gjerësisë së asfaltit nga 9 metra, përfshirë bankinat, në 7 metra, nuk sjell ulje të madhe të kostos së ndërtimit. Maksimumi, kjo mund të kursejë rreth 10% të investimit.
- Kryeministri SALI BERISHA: "Rruga e Arbrit shumëfishon marrëdhëniet tregtare dhe marrëdhëniet e gjithanshme me Maqedoninë mike, bën që gjithë portet e Shqipërisë të bëhen gjithnjë e më të përzgjedhur e më të përshtatshme, për Maqedoninë dhe për Bullgarinë perëndimore. Rruga e Arbrit do të jetë rruga e fluksit të madh turistik".
- Ministri i Transporteve, SOKOL OLLDASHI: Kryeministri i këtij vendi ka marrë vendimin politik për ta ndërtuar këtë rrugë, pavarësisht kostos financiare". (11 maj 2009, Pallati i Kongreseve)

Ndryshimet për keq në Rrugën e Arbërit janë "gurë nën rrota" kundër zhvillimit infrastrukturor në vend, kundër zhvillimit të vendit dhe integrimit të Shqipërisë. Kështu, është koha që çdo njeri i përgjegjshëm në këtë vend, i thjesht apo me autoritet, i papunë apo me poste, drejtues komuna e bashkie apo deputet, etj., të ushtrojë të gjithë të drejtat që i jep statusi civil apo zyrtar, për të korrigjuar gabimet në Rrugën e Arbërit, në mënyrë që nesër të mos kemi një rrugë dykalimshe, por një autostradë të integrimit të Shqipërisë.
Sokol Olldashi dhe kryeministrit të vendit, Sali Berisha. Ministri i Transporteve Sokol Olldashi, një muaj para zgjedhjeje të përgjithshme parlamentare, më 11 maj 2009, në një takim madhështor në Pallatin e Kongreseve deklaroi se "brenda këtij viti do tenderohen tre lote të tjera nga Bulqiza deri të Ura e Vashës dhe një lot nga Tirana drejt urës së Brarit. Do të mbetet një lot i fundit nga Ura e Brarit te Ura e Vashës ku përfshihet edhe një urë që është vepër arti, një urë që është shumë komplekse dhe që do marrë pak më shumë kohë. Sot nuk besoj të flitet më nëse është Rruga e Arbërit apo nuk është Rruga e Arbërit. Rruga e Arbërit avancon çdo ditë, është tashmë një realitet dhe unë kam pasur fatin të jem ministër i Punëve Publike, kur kryeministri i këtij vendi ka marrë vendimin politik për ta ndërtuar këtë rrugë, pavarësisht kostos financiare".
Po ashtu Rruga e Arbërit ka qenë një nga pikat kryesore të Kryeministrit gjatë fushatës elektorale. Por edhe pas fushatës, Kryeministri Berisha në një takim me banorët e Peshkopisë, gjatë inagurimit të një segmenti të Rrugës, tha se "Rruga e Arbrit është shndërrimi në realitet i një ëndrre të banorëve të këtyre zonave, të të gjithë shqiptarëve të trevave të tjera, të lidhura shpirtërisht dhe pazgjidhshmërisht me Dibrën, me Tiranën dhe mbarë Shqipërinë". "Rruga e Arbrit shumëfishon marrëdhëniet tregtare dhe marrëdhëniet e gjithanshme me Maqedoninë mike, bën që gjithë portet e Shqipërisë të bëhen gjithnjë e më të përzgjedhur e më të përshtatshme, për Maqedoninë dhe për Bullgarinë perëndimore. Rruga e Arbrit do të jetë rruga e fluksit të madh turistik".
Jo vetëm gjatë dhe pas fushatës elektorale, por edhe disa ditë më parë, Kryeministri e vuri theksin te infrastruktura rrugore, veçanërisht të Rruga e Arbërit. "Duke ruajtur dhe konsoliduar një nivel shumë të lartë investimesh, janë projekte të mëdha të cilat shqiptarët mezi presin t’i shohin të zbatuar. Janë Rruga e Arbrit, ëndrra e qytetarëve të Elbasanit për t’u lidhur me tunel me qytetin e Tiranës, Boshti i Jugut dhe një seri projektesh të mëdha. Në një mandat katër vjeçar ne do të asfaltojmë 7 mijë kilometra rrugë; autostrada, rrugë kombëtare, rrugë rurale, rrugë dytësore në fshatra dhe qytete. Projekti ynë për një Shqipëri tjetër do të vazhdojë me agresivitetin më të lartë", tha kryeministri Berisha në takimin e Komitetit të Planifikimit të Strategjive, më datë 27 tetor, i cili mori në shqyrtim projektbuxhetin për vitin 2010- të.
Por a është në dijeni kryeministri për ndryshimet e fundit që po i bëhen projektit?
Burimet e gazetës thanë se nuk besonin se kryeministri kishte informacion mbi çështjet teknike të rrugës, duke lënë të kuptohej se këto ndryshime po ndodhnin vetëm për arsyen e kostos së lartë financiare. Një specialist në projektimin dhe ndërtimin e rrugëve tha se ndryshimi i gjerësisë së asfaltit nga 9 metra, përfshirë bankinat, në 7 metra, nuk sjell ulje të madhe të kostos së ndërtimit. Maksimumi, kjo mund të kursejë rreth 10% të investimit, ose për rastin konkret deri në 30 milionë euro, kosto e papërfillshme në perspektivën rajonale të infrastrukturës rrugore. Por, ky argument bie poshtë në rastin e Rrugës së Arbërit, pasi është i vetmi segment rrugor në vend, financimet e të cilit janë pothuajse të garantuara. Siç është njoftuar edhe më parë nëpërmjet gazetës "Rruga e Arbërit" apo media të ndryshme, investitorë të ndryshëm, italianë, gjermanë, austriakë, turq, etj, kanë shfaqur herë pas here interesim për të investuar në Rrugën e Arbërit në forma të ndryshme investimi, duke përfshirë koncesionin apo forma të ndërmjetme investimi mes koncesionit dhe investimeve nga buxheti.
Ishte Kryeministri Sali Berisha që priti në fillim të muajit gusht presidentin e kompanisë turke TAT Group- Devel.Center, Dr Mehmet Tatlici. Në këtë takim, kompania turke prezantoi projekt propozimet për investime në fushën e energjisë së rinovueshme, në transportin rrugor dhe në turizëm. Ndërkohë që kërkojnë të marrin me konçension ndërtimin e Rrugës së Arbërit si dhe ndërtimin e rrugës Tiranë-Elbasan. Në këtë kuptim, kursimi prej 10% të shpenzimeve në Rrugën e Arbërit do ta nxirrnin të pavlefshëm në planin afatshkurtër ndryshimet në cilësinë e rrugës. Rruga e Arbërit, si asnjë investim tjetër në Shqipëri në këto 20 vite pluralizëm, është një investim i kërkuar me ngulm nga njerëzit e përgjegjshëm të këtij vendi. Janë individë, shoqata, institucione që gjatë këtyre viteve kanë pasur si kryefjalë ndërtimin e rrugës, si një mundësi e integrimit rajonal të rajonit të Dibrës, Matit, Tiranës dhe shqiptarëve të Maqedonisë.
Rruga e Arbërit është segmenti që lidh më shkurtër shtetet e bashkësisë Europiane, Bullgarisë me pjesën tjetër të perëndimit. "Vënia në shfrytëzim e kësaj rruge do të ketë një impakt të jashtëzakonshëm, jo vetëm për Dibrën, por edhe për trevat e banuara nga shqiptarët në Maqedoni, për zonën e Matit pa përjashtim, për Tiranën, Durrësin e të gjithë vendin.
Pasuritë e jashtëzakonshme të trevave të Dibrës andej dhe këtej kufirit do të vihen në lëvizje si kurrë më parë. Sofja, kryeqendra e Bullgarisë, me rrugën e Arbërit bëhet me afër me Durrësin, pra me detin Adriatik se sa me Detin e Zi. Në kushtet e një Europe të bashkuar dhe pa kufij, kjo është shumë domethënëse" ka thënë Ing. Faruk Kaba, në një intervistën për gazetën numrin e kaluar. Në këto kushte, ndryshimet për keq në Rrugën e Arbërit janë "gurë nën rrota" kundër zhvillimit infrastrukturor në vend, kundër zhvillimit të vendit dhe integrimit të Shqipërisë. Kështu, është koha që çdo njeri i përgjegjshëm në këtë vend, i thjesht apo me autoritet, i papunë apo me poste, drejtues komuna e bashkie apo deputet, etj., të ushtrojë të gjithë të drejtat që i jep statusi civil apo zyrtar, për të korrigjuar gabimet në Rrugën e Arbërit, në mënyrë që nesër të mos kemi një rrugë dykalimshe, por një autostradë të integrimit të Shqipërisë.
Spoiler:
Dibra.Org"Gazeta Rruga e Arberit"